Sertifikat berish, saqlab turish, kengaytirish, qisqartirish, to‘xtatib turish va bekor qilish qoidalari

1. Sertifikat berish

Sertifikat berish (berishni rad etish) to‘g‘risidagi qaror baholashning barcha materiallari tahlili asosida baholashda ishtirok etmagan texnik ekspert tomonidan qabul qilinadi. Sertifikat yagona elektron shaklda rasmiylashtiriladi, organ rahbarining elektron imzosi bilan tasdiqlanadi va qaror sanasidan boshlab ikki ish kuni ichida davlat reyestrida (sertifikat.tris.uz) ro‘yxatga olinadi.

• partiyaga berilgan sertifikatning amal qilish muddati — mahsulotning yaroqlilik (kafolat) muddati;
• seriyali ishlab chiqariladigan mahsulotga — uch yil;
• 3А sxemasi bo‘yicha — bir kalendar yildan oshmaydi;
• sertifikatni qo‘llash huquqini boshqa shaxslarga berishga yo‘l qo‘yilmaydi;
• rad etilganda arizachiga sabablari va shikoyat qilish tartibi ko‘rsatilgan asoslantirilgan xabarnoma yuboriladi.

2. Sertifikatlashni saqlab turish

Seriyali ishlab chiqariladigan mahsulot (1С sxemasi) uchun davriy baholash (inspeksiya nazorati) o‘tkaziladi: birinchisi — sertifikat berilgan sanadan boshlab 12 oydan kechikmay, keyingilari — yillik jadval bo‘yicha. Natijalar bo‘yicha sertifikat amalini tasdiqlash, to‘xtatib turish yoki tugatish to‘g‘risida qaror qabul qilinadi.

• sertifikat egasi mahsulot konstruksiyasi (tarkibi) yoki texnologiyasidagi rejalashtirilgan o‘zgarishlar haqida o‘zgartirilgan mahsulot chiqarilishidan kamida 30 kun oldin organni yozma ravishda xabardor qiladi;
• xato va xatoliklar, ishlab chiqaruvchining tashkiliy-huquqiy shakli yoki TIF TN kodi o‘zgarganda o‘zgartirishlar sertifikat egasining yozma murojaati bo‘yicha 10 ish kuni ichida sertifikat va reyestrga kiritiladi.

3. Sertifikatlash sohasini kengaytirish

Sertifikat egasi sertifikatni bergan organga qo‘shimcha mahsulot turlari, markalari yoki modellarini ko‘rsatgan holda ariza beradi. Identifikatsiya, namuna olish va sinovlar o‘tkaziladi; ularning natijalari bo‘yicha sertifikat amal qilish sohasini kengaytirish to‘g‘risida qaror yoki asoslantirilgan rad javobi beriladi.

4. Sertifikatlash sohasini qisqartirish

Qisqartirish rejali yoki rejadan tashqari inspeksiya nazorati natijalari bo‘yicha, mahsulotning bir qismi talablarga mos kelmasa yoki ishlab chiqarilmasa amalga oshiriladi. Qaror sertifikat egasiga ikki ish kuni ichida yetkaziladi; o‘zgartirishlar sertifikat va davlat reyestriga kiritiladi, sertifikat egasi chiqarilgan mahsulotga nisbatan sertifikatlashga havolalarni to‘xtatadi.

5. Sertifikat amalini to‘xtatib turish

Sertifikat amali, xususan, quyidagi hollarda to‘xtatib turiladi:

• mahsulot sababli odamlar hayoti va sog‘lig‘iga, mol-mulkka, atrof-muhitga xavf tug‘ilganda;
• mahsulot texnik reglament talablariga mos kelmaganda;
• organ konstruksiya (tarkib) yoki texnologiya o‘zgarishi haqida xabardor qilinmaganda;
• davriy baholashni o‘tkazish yoki unga to‘lash rad etilganda;
• sertifikat yoki muvofiqlik belgisidan noqonuniy foydalanilganda;
• sertifikat egasining yozma arizasiga ko‘ra.

To‘xtatib turish to‘g‘risidagi qarorda tuzatish choralari muddatlari ko‘rsatiladi. Sertifikat egasi talablarga mos kelmaydigan mahsulot miqdorini aniqlaydi, tuzatish choralarini bajaradi, iste’molchilarni xabardor qiladi va bu haqda organga yozma ravishda ma’lum qiladi.

6. Sertifikat amalini tiklash

Tuzatish choralari bajarilgandan keyin va baholash natijalari ijobiy bo‘lganda organ sertifikat amalini tiklaydi va ma’lumotlarni davlat reyestriga kiritadi.

7. Sertifikat amalini tugatish (bekor qilish)

Sertifikat amali tuzatish choralari belgilangan muddatda bajarilmaganda, nomuvofiqliklarni bartaraf etishning iloji bo‘lmaganda, sertifikat egasining arizasiga ko‘ra, shuningdek qonunchilikda belgilangan boshqa hollarda tugatiladi. Tugatilgandan keyin sertifikat egasi sertifikatdan va sertifikatlashga havola qilingan reklama materiallaridan foydalanishni to‘xtatadi.

8. Xabardor qilish va shikoyat qilish

Sertifikat amali to‘xtatib turilgani, tiklangani yoki tugatilgani haqida organ ikki ish kuni ichida sertifikat egasini va davlat reyestriga kiritish uchun Texnik jihatdan tartibga solish agentligini xabardor qiladi. Organ qarorlari ПСК-16 da belgilangan tartibda shikoyat qilinishi mumkin — Shikoyat va apellyatsiyalarni ko‘rib chiqish.